Amodiño ma non troppo

Hai mellor maneira de comezar este mes de abril que con versos de Rosalía de Castro e música de Andrés Gaos nas voces de nenos e nenas de toda Galiza? Claro que non! Aquí temos esta linda versión na que participaron os e as pequecoristas do noso conservatorio na primeira edición de “ No Bico un cantar, nenos e nenas  cantan a Rosalía”, organizada polo Consello da Cultura Galega, no marco da celebración do 150 aniversario da edición de “ Cantares gallegos”. Aquel 7 de xuño de 2013 máis de cincocentos nenos e nenas cantaban a Rosalía en Bonaval, a nosa emoción ao escoitalos anos despois é igual ou maior que aquel día. Feliz comezo de abril con esta xoia do noso patrimonio poético-musical! Rosa de abril  Nasin cando as prantas nasen, no mes das froles nasín, nunha alborada mainiña, nunha alborada de abril. Por eso me chaman Rosa, mais a do triste sorrir, con espiñas para todos, sin ningunha para ti. Desque te quixen, ingrato, todo acabóu para min, que eras ti para min todo, miña groria e

  Unha nova entrega de Musicando a Carvalho Calero chega ao noso blog. O alumnado de piano complementario segue a traballar na figura do escritor ferrolán, con máis poemas e máis música! Hoxe é o turno dos traballos realizados por Susana González Julias de 6º GP, Marta Monteagudo Meijón de 5º GP e Jorge Orosa López tamén de 5º GP. Parabéns aos tres polos vosos traballos!! Compartimos tamén unha foto da homenaxe a Carvalho Calero do pasado sábado organizada pola  Fundaçom Artábria de Ferrol, na que participou Omar Calderón Yáñez alumno do noso conservatorio. Grazas ao fotógrafo Pedro Branco, por cedernos a foto para o noso blog.

Este vindeiro sábado 27 de marzo ás 12:30 h, a Fundaçom Artábria de Ferrol, organiza unha homenaxe á figura de  Carvalho Calero, no XXXI aniversario da súa morte.  O acto que terá lugar na praza da rúa de San Antonio, fronte as ruínas da súa casa natal, contará con música música tradicional e con poesía, nas voces de Loreto De Castro e de Omar Calderón Yáñez, alumno do noso conservatorio e colaborador das iniciativas do EDLG do Xan Viaño. Animámosvos a que asistades! Que mellor forma de comenzar as vacacións que coa poesía de Carvalho Calero!!

Dende o Equipo de Biblioteca do noso conservatorio, infórmannos dun material didáctico moi interesante que hai na biblioteca a disposición de todos. Trátase dunha publicación realizada pola Consellería de Cultura, Educación e Ordenación Universitaria, que ten como obxectivo a difusión de autores galegos entre o alumnado que está a formarse nos conservatorios de música. Está composta por unha compilación de composicións musicais escritas especificamente para que sirvan de material didáctico de apoio ao profesorado das distintas especialidades instrumentais, realizadas por compositores galegos. Podemos atopar obras de diferentes  niveis  de  dificultade,  para as especialidades de Clarinete, Frauta, Fagot, Óboe, Saxofón, Trompa, Trombón, Trompeta, Tuba, Contrabaixo, Arpa, Viola, Violín, Violoncello, Percusión e Guitarra. Grazas ao equipo da Biblioteca por apoiarnos sempre nas nosas iniciativas!  Animámosvos a que visitedes a nosa Biblioteca!

O EDLG do Xan Viaño quere en primeiro lugar, dar as grazas a todos os participantes do concurso de creación artística Ricardo Portela e darlles os nosos parabéns pola calidade dos traballos presentados. O xurado, formado por membros do Equipo de Dinamización da Lingua Galega e do Departamento de Música Tradicional, tívoo realmente difícil á hora de decidir o gañador, pois todos os traballos eran merecedores de premio. Estamos moi satisfeitas con este proxecto, pois o obxectivo principal de difundir e dar a coñecer a figura do gaiteiro Ricardo Portela, acadouse sen lugar a dúbidas, superando todas as expectativas.  Tendo en conta principalmente a orixinalidade e a creatividade dos traballos presentados, o xurado decidiu outorgar o 1º Premio a Omar Calderón Yáñez e Andrés Rodríguez Boutureira , coa súa orixinal versión da Muiñeira de Cabanas. Parabéns! Dado o alto nivel das obras, o xurado decidiu entregar outros dous premios máis, para Elisa Sardiña López e para Iker Meizoso Sánchez .

Hoxe presentamos unha entrega moi moi especial na nosa permanente homenaxe a Carvalho Calero, cun dos seus poemas máis fermosos recitado por varios dos nosos antigos alumnos que hoxe están polo mundo enteiro. Ferrol, 1916 emociónanos nas súas voces, e dende o Equipo de Dinamización da Lingua Galega, non podemos estar máis orgullosas e agradecidas por colaboraren con nós na difusión do noso patrimonio cultural e na reivindicación da figura de Carvalho Calero. Parabéns a todos eles e grazas de todo corazón !

Hoxe, 8 de marzo, o mundo enteiro celebra o Día Internacional da Muller. Este Equipo de Dinamización da Lingua do Xan Viaño súmase, por suposto, a esta celebración, mais queremos dende o noso pequeno rincón de Amodiño ma non troppo poñer o foco nas nosas compositoras. É preciso rescatar do esquencemento ás grandes compositoras galegas de música clásica, mais pouco sabemos das súas vidas, xa que a pesar de ser pioneiras a historia levounas a lugares invisibles. Eugenia Osterberger, Obdulia Prieto ou Ángeles Gulín son tres grandes exemplos do noso patrimonio que quedaron na sombra. Dende Amodiño ma non troppo queremos reinvidicar o patrimonio galego das compositoras e intérpretes galegas do pasado e do presente, e a mellor homenaxe que hoxe lles podemos rendir é escoitar e interpretar a súas músicas, así que vos propoñemos escoitar as verxións maxistrais de Ángeles Gulín ou esta fermosa melodía de Eugenia Osterberger.